Vaasa hálddahusriekti lea addán čovdosiid čuovvovaš Davvi-Suoma guovlohálddahusdoaimmahaga čáhcelágas oaivvilduvvon mearrádusaide

Vaasa hálddahusriekti 28.10.2026

Davvi-Suoma guovlohálddahusdoaimmahat 29.7.2024 ja 24.3.2025

Vaasa hálddahusriekti lea addán čovdosiid čuovvovaš Davvi-Suoma guovlohálddahusdoaimmahaga čáhcelágas oaivvilduvvon mearrádusaide:

• 29.7.2024 nr 97/2024 PVO-Vesivoima Oy ja Kemijoki Oy Giemajoga ja Raudanjoki čáhcefápmorusttegiid guolledoallogeatnegasvuođaid nuppástuhttimis.
• 29.7.2024 nr 98/2024 PVO-Vesivoima Oy Iijoki čáhcefápmorusttegiid guolledoallogeatnegasvuođaid nuppástuhttimis ja
• 24.3.2025 nr 37/2025 guollegeainnu huksemis Kemijoki Oy Taivalkoskis čáhcefápmorusttega oktavuhtii ja guollegeidnui laktáseaddji čázi sirdimis ja bumpemis.

Guovlohálddahusdoaimmahaga mearrádusat nr 97/2024 ja 98/2024

Lappi ealáhus-, johtolat- ja birasguovddáš lei guolledoalloeiseváldin ohcan Giemajoga Isohaara, Taivalkoski, Ossauskoski, Petäjäskoski, Valajaskoski, Vanttauskoski, Pirttikoski ja Seitakorva čáhcefápmorusttegiid, Raudanjoki Permantokoski čáhcefápmorusttegiid ja Iijoki Raasakka, Maalismaa, Kierikki, Pahkakoska ja Haapakoski čáhcefápmorusttegiid guolledoallogeatnegasvuođaid nuppástuhttima čáhcelága 3 logu 22 § vuođul. Ohccojuvvon nuppástusaid mihttomearrin lei máhcahit goargŋu guliid luonddubirrajođu, dainna ahte hukse guollegeainnuid ja vulosvuodjanráhkadusaid. Lassin ulbmilin lea nuppástuhttit earret eará veajehiid gilvimiid guoski mearrádusaid.

Guovlohálddahusdoaimmahat hilggui ohcamuša ollásit Vanttauskoski, Seitakorva ja Raudanjoki čáhcefápmorusttegiid oasil. Iijoki ja eará Giemajoga fápmorusttegiid oasil guovlohálddahusdoaimmahat nuppástuhtii guolledoallogeatnegasvuođaid nu, ahte lohpehálddašeaddjit geatnegahttojit čielggadit mo ordnet dakkár ráhkadusaid, mat dahket vejolažžan guliid johtima ja mat leat nu beaktilat go vejolaš. Lassin lohpehálddašeaddjit galget ohcat lobi dárbbašuvvon nuppástusaide. Ásahuvvon geatnegasvuođat ledje muhtun muddui earáláganat go Lappi ealáhus-, johtolat- ja birasguovddáža gáibidan geatnegasvuođat. Dasa lassin guovlohálddahusdoaimmahat earret eará loktii fuomášahtti olu dan meari, maid veajehiid galgá gilvit goappáge johkasystemas ja johnjálmmi mearraguovllus.

Guovlohálddahusdoaimmahaga mearrádusain váide PVO-Vesivoima Oy, Kemijoki Oy ja Lappi ealáhus-, johtolat- ja birasguovddáš, Meahciráđđehus ja máŋggat gielddat, ovttastusat, guolástangottit, juohkogottit ja priváhtaolbmot. Giemajoga ja Raudanjoki guoski mearrádusas nr 97/2024 dahkkojedje oktiibuot 13 váidaga ja Iijoki guoski mearrádusas nr 98/2024 dahkkojedje 12 váidaga.

PVO-Vesivoima Oy ja Kemijoki Oy gáibidedje, ahte guovlohálddahusdoaimmahaga mearrádusat gomihuvvojit dahje dat galggašedje goit nuppástuhttot. Fitnodagat bukte ovdan ákkastallamiin earret eará, ahte dilit eai leat nuppástuvvan čáhcelága 3 logu 22 § eaktudan mihtilmas ollu. Lassin ákkastalle, ahte geatnegasvuođaid ollašuhttin áittašii regulerenfámu buvttadeami ja fuolahussihkarvuođa. Maiddái gávnnahuvvui, ahte ii leat vejolaš máhcahit goargŋu guliid luonddubirrajođu ja ahte dáid geatnegahtton doaibmabijuid ollašuhttiin livččii leamaš menddo divrras. Eará nuppástusohccit gáibidedje nuppástusaid addojuvvon mearrádusaide ja ahte geatnegasvuođat viiddiduvvojit guoskat maiddái Vanttauskoski, Pirttikoski, Seitakorva ja Raudanjoki čáhcefápmorusttegiid.

Hálddahusriekti oaivvildii, ahte eavttut čáhcefápmorusttegiid guolledoallomearrádusaid nuppástuhttimii gávdnojedje ovdalaččas juo ja ahte goargŋu guliid luonddubirrajođu livččii vejolaš ain juo oasil máhcahit, muhto dárkilut mearrádusaid luonddubirrajođu máhcaheapmái ii leat vejolaš addit prošeavtta dán muttus. Dán dihtii hálddahusriekti hilggui áššis evttohuvvon dárkilis gáibádusaid ovdamearkka dihte boares nuriid čáhccemis ja guollejohtima beaktilisvuođa guoskevaš rádjeárvvuid ásaheamis ja nuppástuhtii guovlohálddahusdoaimmahaga mearrádusaid nu, ahte PVO-Vesivoima Oy ja Kemijoki Oy galget gárvvistit guđege fápmorusttegii plánaid guollejohtima ordnemii. Fitnodagat galget árvvoštallat prošeavtta ollašuhttima váikkuhusaid elrávdnjefierpmi doibmii ja fuolahussihkarvuhtii nu, ahte mielde leat maiddái oktasašváikkuhusat, ja vugiid dáid váikkuhusaid geahpedeapmái dahje jávkadeapmái. Guliid johtima galgá vuosttažettiin ordnet goargŋun- ja vulosvuodjanráhkadusaiguin. Jos dát ii leat vejolaš muhtun čáhcefápmorusttega dahje johkaossodaga oasil árvvoštallamis ovdan boahtán ákkastallojuvvon siva dihte, galgá daid oasil evttohit eará doaibmabijuid, mat dorjot luosa ja guvžžá lunddolaš eallingearddi. Maŋimus molssaeaktun galgá evttohit eará doaibmabijuid guolledoallomearrádusaid nuppástuhttimii, vai dat vástidivččii mearkkašahtti ollu nuppástuvvan diliid. Dasa lassin hálddahusriekti viiddidii dáid geatnegasvuođaid guoskat maiddái Vanttauskoski, Pirttikoski, Seitakorva ja Raudanjoki čáhcefápmorusttegiid.

Hálddahusriekti gomihii guovlohálddahusdoaimmahaga mearrádusaid main ledje earret eará nuppástuhttán gilvingeatnegasvuođaid ja máhcahii fápmui ovddit geatnegasvuođaid. Hálddahusriekti oaivvildii, ahte jus gilvimiid lasiha sakka seammá áigge go čađahuvvojit doaimmat, mat dorjot lunddolaš lassáneami, sáhtášii dat lasihit ovttaskas guliid gaskasaš gilvvu ja heajudit lunddolaččat lassáneaddji máddodaga máhcaheami. Gilvimiid lasiheapmi livččii maiddái gáibidan, ahte gilvinkapasitehta lasihuvvo ollu ja dat oassi das livččii maŋŋelabbos báhcán goittotge oassái atnemeahttumin. Dán dihtii gilvimiid lasiheamis boahtán golut livčče meariheamit gaskaboddosaš ávkkiid ektui.

Guovlohálddahusdoaimmahaga mearrádus nr 37/2025

Kemijoki Oy lei ohcan lobi hukset Taivalkoski čáhcefápmorusttega oktavuhtii guollenuori dalle go ovdalis oaivvilduvvon áššit ledje gaskan guovlohálddahusdoaimmahagas. Guovlohálddahusdoaimmahat mieđihii prošektii lobi.

Guokte birassearvvi váide mearrádusas, ja vuosttas sajis dat gáibidedje ášši máhcaheami ođđasit gieđahallamii dan maŋŋá, go ovdalis oaivvilduvvon Kemijoki ja Raudanjoki fápmorusttegiid guolledoallogeatnegasvuođaid nuppástusohcamuš lei lágafámolaččat čovdojuvvon. Nuppi sajis searvvit gáibidedje, ahte lohpái čállojuvvojit eavttut birrajagáš ekologalaš jotkkolašvuođa, ekologalaš golganmeari ja geasuhanrávnnji ollašuhttimii ja goalmmát sajis, ahte guovlohálddahusdoaimmahaga mearrádus gomihuvvo. Dehálamos váidinággan birassearvvit bukte ovdan, ahte gažaldat lei duođalaččat guolledoallogeatnegasvuođa nuppástuhttimis, man livččii galgan gieđahallat ovttas Giemajoga ja Raudanjoki čáhcefápmorusttegiid guolledoallogeatnegasvuođaid nuppástusohcamušain. Mearrádusas oaivvilduvvon guollegeaidnu sáhtášii dagahit almmolaš ávkki manaheami, go almmolaš ávkki dorvvasteaddji Giemajoga ja Raudanjoki fápmorusttegiid guolledoallogeatnegasvuođaid loahpalaš sisdoallu lei vel čoavddekeahttá.

Hálddahusriekti hilggui váidaga. Almmolaš ávkki manaheapmin ii sáhttán doallat dan, ahte Lappi ealáhus-, johtolat- ja birasguovddáža prošeakta livččii vejolaččat birrasa dáfus buoret. Guovlohálddahusdoaimmahat ii mannan badjel árvvoštallanválddis, go dat lei čoavdán Taivalkoski guollegeaidnoprošeavtta ovdal go Lappi ealáhus-, johtolat ja birasguovddáža johtui bidjan ohcamušas addojuvvon mearrádusa guoski váidagat ledje lágafámolaččat čovdojuvvon. Guovlohálddahusdoaimmahat ii maid lean doaibman boastut, go dat ii lean gieđahallan ášši čáhcelága 3 logu 22 § eaktudan guolledoallogeatnegasvuođa dárkkistanáššin. Guolledoallogeatnegasvuođa nuppástuhttima guoski prošeakta lei váldon vuhtii guollegeaidnoprošeavtta lohpegieđahallamis.

Go ášši lei gaskan hálddahusrievttis, Kemijoki Oy lei ohcan lobi álggahit prošeavtta váidagis fuolatkeahttá. Hálddahusriekti hilggui ohcamuša.

Hálddahusrievtti mearrádusaide lea vejolaš ohcat nuppástuhttima alimus hálddahusrievttis, jos alimus hálddahusriekti mieđiha váidinlobi.

Lassidieđut: hálddahusriekteduopmár Patrick Sahlström, tel. 029 56 42749.

Mearrádusat (suomagillii) leat oppalaččat dán dieđáhusa čuovusin. Diehtosuodjesivaid dihte mearrádusain, mat almmustahttojit neahtas, leat sihkkojuvvon persovdnadieđut eret.